ಸಂಸ್ಥೆಯ ಬಗ್ಗೆ

ಅನ್ಯಾಯ ಅಧರ್ಮಗಳ ಮೆಟ್ಟಿ ನಿಂತು, ಸದಾ ಸತ್ಯ, ಧರ್ಮ, ನ್ಯಾಯದ ರಕ್ಷಣೆಗಾಗಿ ಹೋರಾಡಿದ ತುಳುನಾಡ ಅವಳಿ ವೀರರಾದ ಕೋಟಿ – ಚೆನ್ನಯರ ವೀರಗಾಥೆ, ಪಾಡ್ದನದಲ್ಲಿ ಉಲ್ಲೇಖವಿರುವಂತೆ “ಏಳ್ ಇರ್ಲು ಎಡ್ಮ ಪಗೆಲ್ ಪನ್ಪಿನಾತುಂಡು”. ಅಂದರೆ ಹೇಳಹೊರಟರೆ ಏಳು ರಾತ್ರಿ ಎಂಟು ಹಗಲು ಸಾಲದು. ಅಂತಹ ಕೋಟಿ-ಚೆನ್ನಯರ ಕಾಲದಲ್ಲಿ ಅಂಗ ಸಾಧನೆ, ಮಲ್ಲ ಸಾಧನೆಗಳ ಕೇಂದ್ರವಾಗಿದ್ದ, ಇಂದು ಕೋಟಿ -ಚೆನ್ನಯರನ್ನು ಆರಾಧಿಸುತ್ತಿರುವ ಗರೋಡಿಗಳು 250 ಕ್ಕೂ ಹೆಚ್ಚಿವೆ. ಕೋಟಿ – ಚೆನ್ನಯರು ತಮ್ಮ ಜೀವಿತ ಕಾಲದಲ್ಲಿಯೇ 66 ಗರೋಡಿ 33 ತಾವುಗಳನ್ನು ಕಟ್ಟಿಸಿಕೊಂಡಿದ್ದರು ಎಂಬುದು ಇಂದಿಗೂ ಬೈದರ ದರ್ಶನದ ನುಡುಕಟ್ಟಿನಲ್ಲಿದೆ. ಇಂದು ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಐನೂರರಿಂದ ಸಾವಿರ ಮನೆಗಳಿಗೊಂದು ಗರೋಡಿಯಿದ್ದು ಕೂಡುಕಟ್ಟಿನ ವ್ಯವಸ್ಥೆಯಿದೆ. ನಂಬುವ ಲಕ್ಷೋಪಲಕ್ಷ ಭಕ್ತರಿದ್ದಾರೆ. ಸುಮಾರು ಐನೂರು ವರ್ಷಗಳ ಹಿಂದೆ ಕೋಟಿ-ಚೆನ್ನಯರು ಹುಟ್ಟಿ ಬೆಳೆದು ಬಾಳಿದ ಪಡುಮಲೆ, ಪಂಜ, ಎನ್ಮೂರುಗಳಲ್ಲಿ ಅವರ ಆಡಂಬೋಲದ ಜೀವಂತ ಕುರುಹುಗಳಿವೆ. ಇವುಗಳೆಲ್ಲವೂ ಅಧ್ಯಯನಯೋಗ್ಯ ವಿಷಯಗಳು. ಇವುಗಳ ಕ್ರಮಬದ್ಧ ಸಂಶೋಧನೆ, ಅಧ್ಯಯನ ನಡೆಸಿ ನಮ್ಮ ಹಿರಿಯರ ಚರಿತ್ರೆ, ನಂಬಿಕೆ, ಆಚರಣೆಗಳ ಮಾಹಿತಿಗಳನ್ನು ಮುಂದಿನ ಪೀಳಿಗೆಗೆ ಕಾಪಿಡಬೇಕೆಂಬ ಸದುದ್ದೇಶದಿಂದ 1984-85 ರಲ್ಲಿ 15 ಮಂದಿ ಸಮಾನ ಮನಸ್ಕರು ಸೇರಿ ಉಡುಪಿಯ ಆದಿವುಡುಪಿಯಲ್ಲಿ ಆರಂಭಿಸಿದ ಸಂಸ್ಥೆಯೇ “ಶ್ರೀ ಬ್ರಹ್ಮ ಬೈದರ್ಕಳ ಸಾಂಸ್ಕೃತಿಕ ಅಧ್ಯಯನ ಪ್ರತಿಷ್ಠಾನ (ರಿ.), ಆದಿವುಡುಪಿ” ತಾ. 11.12.1988 ರಂದು ಗೋವಿಂದ ಪೈ ಸಂಶೋಧನಾ ಕೇಂದ್ರ, ಎಮ್. ಜಿ. ಎಮ್. ಕಾಲೇಜ್, ಉಡುಪಿ ಇಲ್ಲಿ ವಿದ್ವಜ್ಜನರ ಸಮ್ಮುಖದಲ್ಲಿ ಉದ್ಘಾಟನೆ ಮಾಡುವ ಮುಖಾಂತರ ಸಂಸ್ಥೆಯನ್ನು ಸಮಾಜಕ್ಕೆ ಪರಿಚಯ ಮಾಡಲಾಯಿತು. 14.09.1988 ರಲ್ಲಿ ಸಂಸ್ಥೆಯನ್ನು ನೋಂದಾಯಿಸಲಾಯಿತು. ನೋಂದಾವಣಿ ಸಂಖ್ಯೆ 28 / 88-89.