Shree Brahma Baidarkala Garodi Kolachur

ಗರೋಡಿಯ ಆವರಣದೊಳಗೆ ಪಿಲ್ಚಂಡಿ ದೈವದ ಗುಡಿಯೊಳಗೆ ಮಣೆ ಮಂಚದಲ್ಲಿ ಪಿಲ್ಚಂಡಿಯ ಆರಾಧನೆಯಿದೆ. ಗರೋಡಿಯ ಪರಿಸರದಲ್ಲಿ ಗರೋಡಿಗೆ ಸಂಬಂಧಪಟ್ಟ ನಾಗಬನವೊಂದಿದೆ.

ಪೂ ಪೂಜನೆ ಸೇವೆ ಮಾಡುತ್ತಿದ್ದ ಗರೋಡಿ ಮನೆ ಕುಟ್ಟಿ ಪೂಜಾರಿಯವರು ಇತ್ತೀಚೆಗೆ ತೀರಿ ಕೊಂಡಿದ್ದು ಪೂ ಪೂಜನೆಯ ಪೂಜಾರಿಯ ನೇಮಕವಾಗಲಿಲ್ಲ. ಸದ್ಯ ಎಲ್ಲೂರು ಗರೋಡಿಯ ಕರುಣಾಕರ ಪೂಜಾರಿಯವರು ಪೂ ಪೂಜನೆ ಮಾಡುತ್ತಿದ್ದಾರೆ. ಕುಟ್ಟಿ ಪೂಜಾರಿಯವರಿಗೆ ಮೊದಲು ಸೇಸು ಪೂಜಾರಿ, ಕುಡ್ಡು ಪೂಜಾರಿಯವರು ಈ ಸೇವೆ ಮಾಡುತ್ತಿದ್ದರು.

ಗರೋಡಿಗೆ ಆಡಳಿತ ಸಮಿತಿಯಿದ್ದು ಕೃಷ್ಣ ಅಂಚನ್ ಉಳ್ಳೂರು ಇವರು ಅಧ್ಯಕ್ಷರಾಗಿಯೂ ದಾಮೋದರ ಬಿ. ಕೋಟ್ಯಾನ್, ಪಾದೆಬೆಟ್ಟು ಇವರು ಉಪಾಧ್ಯಕ್ಷರಾಗಿಯೂ ಕಾರ್ಯನಿರ್ವಹಿಸುತ್ತದ್ದಾರೆ.

ಸದ್ಯ ಈ ಗರೋಡಿಯಲ್ಲಿ ಬೈದ್ಯರ ದರ್ಶನಕ್ಕೆ ಸ್ಥಳ ಪಾತ್ರಿಗಳಿಲ್ಲ. ಹಿಂದೆ ಹಿರಿಯರಾದ ಕುಡ್ಡು ಪೂಜಾರಿ, ಗುರುವ ಪೂಜಾರಿ ಸ್ಥಳ ಪಾತ್ರಿಗಳಾಗಿದ್ದರು.

ಗರೋಡಿಯಲ್ಲಿ ಮಂಗಳವಾರ ಪೂಜೆ, ಸಂಕ್ರಾಂತಿ ಪೂಜೆ (ಸೂಡ) ಚೌತಿ ಪೂಜೆ, ಹೂವಿನ ಪೂಜೆ, ಕದಿರುಕಟ್ಟುವುದು, ಮಕರದ ಹುಣ್ಣಿಮೆಯಂದು ಗರಡಿ ಪ್ರವೇಶ ಮರುದಿನ ಅಗೆಲು ಸೇವೆ, ನಂತರದ ದಿನ ಬೈದೇರುಗಳ ನಮೋತ್ಸವ, ಜೋಗಿಪುರುಷರ ಕೋಲ, ಅದರ ಮರುದಿನ ಮಾಯಂದಾಲ್ ದೈವದ ಕೋಲ ಸೇವೆ ನಡೆಯುತ್ತದೆ.

ಕೊಳಚ್ಚೂರು, ಉಳ್ಳೂರು, ಕೇಮುಂಡೇಲು, ಸಜೆ ಗ್ರಾಮಗಳಜನರು ಈ ಗರೋಡಿಯ ಕೂಡುಕಟ್ಟಿಗೆ ಸೇರಿದವರಾಗಿದ್ದು ಗರೋಡಿಯಲ್ಲಿ ನೀರು ಸ್ನಾನ, ಕಂಚಿಲ್ ಸೇವೆ, ಮದುವೆ ಮುಂತಾದ ಶುಭ ಸಂದರ್ಭಗಳಲ್ಲಿ ತೆಗೆದಿಡುವ ಜೋಡು ಕಾಯಿ ಕಾಣಿಕೆ ಸೇವೆ, ಮುಂತಾದ ಹರಕೆಯ ಸೇವೆಗಳಲ್ಲಿ ಭಾಗಿಯಾಗುತ್ತಾರೆ. ಗರೋಡಿಯ ಎಲ್ಲಾ ಕಾರ್ಯಕ್ರಮಗಳ ಖರ್ಚು ವೆಚ್ಚವನ್ನು ಊರ ಪರವೂರ ಜನರ ವಂತಿಗೆ, ಕಾಣಿಕೆ, ದೇಣಿಗೆಗಳಿಂದ ಭರಿಸಲಾಗುತ್ತಿದೆ.

24-04-2003ರಲ್ಲಿ ಗರೋಡಿಯ ಜೀರ್ಣೋದ್ಧಾರವಾಗಿದ್ದು ಹಿಂದೆ 1941ರಲ್ಲಿ ಜೀರ್ಣೋದ್ಧಾರಗೊಂಡಿತ್ತು.

ಬೊಗ್ಗು ಪರವ, ಮೂಡುಬೆಳ್ಳೆ ಮತ್ತು ಸಂಗಡಿಗರು ಗರೋಡಿಯ ನೃತ್ಯ ವಿಶಾರದರಾಗಿ, ರಮೇಶ್ ಮಡಿವಾಳ ಮುದರಂಗಡಿ ಇವರು ಮಡಿವಾಳರಾಗಿ, ಅಬ್ದುಲ್ ಕರೀಂ ಸಾಹೇಬ್ ಎಲ್ಲೂರು ಇವರು ವಾದ್ಯದವರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.