ಶ್ರೀ ಬ್ರಹ್ಮ ಬೈದರ್ಕಳ ಗರೋಡಿ ಅಡ್ವೆ
ಆಟಿ ತಿಂಗಳಲ್ಲಿ ಅಗೆಲು ಸೇವೆ ನಡೆಯುವ ಆರು ಗರೋಡಿಗಳಲ್ಲಿ ಇದೂ ಒಂದು. ಸ್ಥಳ ಪುರಾಣದಲ್ಲಿ ತಿಳಿದು ಬಂದಂತೆ ಕೋಟಿಚೆನ್ನಯರು ಅಡ್ಡೆಯ ಚೆಕ್ ಪಾದೆಯಲ್ಲಿ ಮೂಡ್ರಗುತ್ತಿನ ಯಜಮಾನರನ್ನು ಕರೆದಾಗ ಅವರು ಅಸಡ್ಡೆ ತೋರಿಸಿ ತಾನು ಬರದೆ ಮನೆ ಹೆಂಗಸರನ್ನು ಕಳುಹಿಸಿದ್ದರಿಂದ ಆ ಮನೆಯಲ್ಲಿ ಹೆಣ್ಣು ಸಂತಾನವೇ ಆಗುವಂತೆ ಶಾಪಗ್ರಸ್ತವಾಯಿತಂತೆ. ಆ ರಾತ್ರಿ ಯಜಮಾನನ ಕನಸಿನಲ್ಲಿ ಬಂದು ಕೋಟಿಚೆನ್ನಯರು ಆದೇಶವಿತ್ತಂತೆ ತೆಂಗಿನ ಕಾಯಿ ಹಾರಿಸಿ ಅದು ಬಿದ್ದ ಜಾಗದಲ್ಲಿ ಗರೋಡಿ ಕಟ್ಟುವಂತೆ ನಿರ್ಧರಿಸಲಾಯಿತು. ಆದರೆ ತೆಂಗಿನ ಕಾಯಿ ಬಿದ್ದ ಸ್ಥಳದಲ್ಲಿ 101 ಕಲ್ಲುಗಳಲ್ಲಿ 100 ಕಲ್ಲುಗಳನ್ನು ಬ್ರಹ್ಮರ ಗುಂಡದ ಅಡಿಯಲ್ಲಿರುವ ಬಾವಿಗೆ ಹಾಕಿ, ಉಳಿದೊಂದು ಕಲ್ಲನ್ನು ಅಲ್ಲಿಂದ ಹಾರಿಸಿದಾಗ ಬಿದ್ದ ಸ್ಥಳದಲ್ಲಿ ನಾಗಬನವನ್ನು ಸ್ಥಾಪಿಸಿದ ನಂತರ ಗರೋಡಿ ಕಟ್ಟಲಾಯಿತು. ಇಂದಿಗೂ ಆ ನಾಗ ಬನದಲ್ಲಿ ನಾಗನ ಕಲ್ಲು ಒಂದೇ ಇದ್ದು ಹೆಚ್ಚಿಗೆ ಕಲ್ಲು ಹಾಕುವಂತಿಲ್ಲ.
ರಾಮ ದಾದು ಪೂಜಾರಿ
ಸದಾನಂದ ಯಾನೆ ಪಕ್ಕು ಪೂಜಾರಿ
ರಾಮ ದಾದು ಪೂಜಾರಿ(72 ವರ್ಷ) ಇವರು ಗರೋಡಿಮನೆ ಮುಖ್ಯಸ್ಥರು. ಗರೋಡಿ ಮನೆಯ ಸದಾನಂದ ಯಾನೆ ಪಕ್ಕು ಪೂಜಾರಿ ಇವರು ಪೂ ಪೂಜನೆಯವರು. ಇವರಿಗೆ ಮೊದಲು ರಾಮ ದಾದು ಪೂಜಾರಿಯವರು ಪೂ ಪೂಜನೆ ಸೇವೆ ಮಾಡಿದ್ದರು. ರಾಮ ದಾದು ಪೂಜಾರಿಯವರಿಗೆ ಸ್ಥಳ ಪಾತ್ರಿಯಾಗಿ ಎಣ್ಣೆ ಕೊಡಲಾಗಿತ್ತು ಆದರೆ ಅವರು ದರ್ಶನಕ್ಕೆ ನಿಲ್ಲಲಿಲ್ಲ. ರಾಮ ದಾದು ಪೂಜಾರಿಯವರ ಮೊದಲು ಹಿರಿಯರಾದ ರಾಘು ಪೂಜಾರಿ, ತೆನ್ನಯ ಪೂಜಾರಿ, ಸೇವೆ ಮಾಡಿದ್ದರು.
ಬೈದ್ಯರ ದರ್ಶನದ ಸ್ಥಳ ಪಾತ್ರಿಗಳು ಸದ್ಯ ಈ ಗರೋಡಿಯಲ್ಲಿ ಇಲ್ಲ. ಹಿಂದೆ ಚೆನ್ನು ಪೂಜಾರಿಯವರು ದರ್ಶನದ ಸ್ಥಳ ಪಾತ್ರಿಗಳಾಗಿದ್ದರು.
ಗರೋಡಿಗೆ ಸೇವಾ ಸಮಿತಿಯಿದ್ದು ಸುಂದರ ಸುವರ್ಣ ಇವರು ಅಧ್ಯಕ್ಷರಾಗಿಯೂ, ನವೀನ್ಚಂದ್ರ ಸುವರ್ಣ ಇವರು ಕಾರ್ಯದರ್ಶಿಯಾಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ.
ಪಲಿಮಾರು, ನಂದಿಕೂರು, ಅವರಾರು ಪೊಯ್ಯ ಹಾಗೂ ಅಡ್ಡೆ ಗ್ರಾಮಗಳ ಜನರು ಈ ಗರೋಡಿಯ ಕೂಡುಕಟ್ಟಿಗೆ ಸೇರಿದ್ದು ನೀರು ಸ್ನಾನ, ಕಂಚಿಲ್ ಸೇವೆ, ಮದುವೆ, ಮುಂತಾದ ಶುಭ ಸಂದರ್ಭದಲ್ಲಿ ತೆಗೆದಿಡುವ ಜೋಡುಕಾಯಿ ಕಾಣಿಕೆ, ಹೆರಿಗೆ ನಂತರ ತಿಂಗಳು ಮಾಡಿಸುವ ಕ್ರಮ ಮುಂತಾದ ಹರಕೆಯ ಸೇವೆಗಳಲ್ಲಿ ಪಾಲ್ಗೊಳ್ಳುತ್ತಾರೆ. ಊರ ಜನರ ವರಡ ವಂತಿಗೆ, ಕಾಣಿಕೆ, ದೇಣಿಗೆಗಳಿಂದ ಕಾರ್ಯಕ್ರಮಗಳ ವೆಚ್ಚವನ್ನು ಭರಿಸಲಾಗುವುದು.
20-05-1998ರಲ್ಲಿ ಗರೋಡಿಯ ಜೀರ್ಣೋದ್ಧಾರವಾಗಿದ್ದು 1960ರಲ್ಲಿಯೂ ಜೀರ್ಣೋದ್ಧಾರವಾಗಿತ್ತು.
ಚೇರ್ಕಾಡಿ ನರಸಿಂಹ ಪರವ ಸಂಗಡಿಗರು, ನೃತ್ಯ ವಿಶಾರದರಾಗಿ, ಅನಿಲ್ ಮಡಿವಾಳ, ಇವರು ಮಡಿವಾಳರಾಗಿ, ಅಬ್ದುಲ್ ಕರೀಂ ಸಾಹೇಬ್ ಎಲ್ಲೂರು ಇವರು ವಾದ್ಯದವರಾಗಿ ಈ ಗರೋಡಿಯ ಸೇವೆ ಮಾಡುತ್ತಿದ್ದಾರೆ.
ಗರೋಡಿಯಲ್ಲಿ ಶ್ರೀ ಬ್ರಹ್ಮ ಬೈದರ್ಕಳ ಅಡ್ವೆ ಗರೋಡಿ ಭಜನಾ ಮಂಡಳಿ ಕಾರ್ಯನಿರ್ವಹಿಸುತ್ತಿದ್ದು ಪ್ರತೀ ಶನಿವಾರ ಭಜನೆ, ಪೂಜೆಗಳು ನಡೆಯುತ್ತವೆ.
ಗರೋಡಿಯ ವಿಳಾಸ:
ನಂದಿಕೂರು ಅಂಚೆ, ಕಾಪು ತಾಲೂಕು,
ಉಡುಪಿ 574111.
ಗರೋಡಿ ಮನೆ ವಿಳಾಸ:
ನಂದಿಕೂರು ಅಂಚೆ,
ಕಾಪು ತಾಲೂಕು,
ಉಡುಪಿ 574111.
ಮೊಬೈಲ್: ರಾಮದಾದು ಪೂಜಾರಿ – 9902212950
ಮೊಬೈಲ್: ಸದಾನಂದ ಪೂಜಾರಿ – 9980947120