Shree Brahma Baidarkala & Vyagra chamundi Udyavara Kuthpadi Garodi

ಸ್ಥಳ ಪುರಾಣದಲ್ಲಿ ತಿಳಿದು ಬಂದಂತೆ, ಆದಿಉಡುಪಿಯ ಪಾಳೇಗಾರ ಪಲ್ಪಟ್ ನಾಯಕರು ಬೇರೆ ಊರಿಗೆ ಯಾವುದೋ ಒಂದು ಸಾಧನೆಗೆ ಹೊರಟು ಹೋಗುತ್ತಿದ್ದಾಗ ಕಿನ್ನಿಮೂಲ್ಕಿಯ ಬಲಾಯಿಪಾದೆ ಬಳಿ ಕುದುರೆ ಮುಗ್ಗರಿಸಿ ಕುಳಿತಿತು. ಅದು ಏದ್ದೇಳದಿದ್ದಾಗ ಪ್ರಶ್ನಾ ಚಿಂತಕರಲ್ಲಿ ಕೇಳಿದರು. ಇಲ್ಲಿ ಕೋಟಿ ಚೆನ್ನಯರು ಗರೋಡಿ ಕಟ್ಟಲು ಬಯಸಿದ್ದಾರೆ ಎಂಬುದಾಗಿ ತಿಳಿದು ಬಂತು. ತಾನು ಕೈಗೊಂಡ ಕಾರ್ಯದಲ್ಲಿ ಗೆದ್ದು ಬಂದರೆ ಗೋಡೆಗೆ ತುಪ್ಪ ಬಳಸಿ ಗರೋಡಿ ಕಟ್ಟುವುದಾಗಿ ಪಲ್ಪಟ್ ನಾಯಕರು ಪ್ರಾರ್ಥಿಸುತ್ತಾರೆ. ಅವರ ಕುದುರೆ ಎದ್ದು ನಿಲ್ಲುತ್ತದೆ. ಅವರು ಯೋಚಿಸಿದ ಕಾರ್ಯ ನೆರವೇರಿದ ಬಳಿಕ ಗರೋಡಿ ಕಟ್ಟಲು ಜಾಗ ಹುಡುಕುತ್ತಾರೆ. ಗರೋಡಿ ಸ್ಥಳ ಆರಿಸಲು ತೆಂಗಿನಕಾಯಿ/ ಚೆಂಡು ಹಾರಿಸಿದಾಗ ಅದು ಈಗ ಗರೋಡಿ ಇರುವ ಮುಳ್ಳಿನ ಬಲ್ಲೆಯ ಜಾಗದಲ್ಲಿ ಬೀಳುತ್ತದೆ. ಇದೇ ಜಾಗದಲ್ಲಿ ಅಂಬಲಪಾಡಿ ಮಹಾಂಕಾಳಿಯ ವಾಹನ ಹುಲಿಚಾಮುಂಡಿ ಮೊದಲೇ ನೆಲೆಯಾಗಿತ್ತು. ಚಾಮುಂಡಿಯೇ ಬೈದೇರುಗಳನ್ನು ಕರೆಸಿಕೊಂಡರು ಎಂಬ ಕಾರಣಕ್ಕೆ ಇಲ್ಲಿ ಹುಲಿಚಾಮುಂಡಿಗೆ ಮೊದಲ ಗೌರವವನ್ನು ಕೊಡಲಾಗುತ್ತದೆ. ಪಲ್ಪಟ್ ನಾಯಕರು ಇಲ್ಲಿ ಗರೋಡಿ ಕಟ್ಟುವಾಗ ಧಾರಾಳ ತುಪ್ಪವನ್ನು ಬಳಸಿದ್ದಾರೆ. ಇಲ್ಲಿ ಗರೋಡಿ ಜೀರ್ಣೋದ್ಧಾರಗೊಳ್ಳುವಾಗ ಈಗಲೂ ಸಾಂಕೇತಿಕವಾಗಿ ತುಪ್ಪವನ್ನು ಗೋಡೆಗೆ ಸುರಿಯುತ್ತಾರೆ.