ತುಲು-ಮಂದೆಲು-ಮಾನಾಯಿನ-ಕೋಟಿ

ಕೋಟಿ ಚೆನ್ನಯೆರ್ ತುಳುನಾಡುದ ಅಮರ್ ಬೀರೆರ್. ಅಕುಲೆನ ಆರಾಧನೆ ಇಪ್ಪುನ 230 ಕ್ಲಾ ಎಚ್ಚ ಗರಡಿಲು ಉಲ್ಲ. ತುಳುನಾಡುದ್ ಬೈದ್ಯೆರ್ಲೆನ್ ಆರಾಧನೆ ಮಲ್ಪುನ ಸಾರ ಸಾರ ಜನೊಕುಲು ಉಲ್ಲೆರ್. ಗರಡಿಲೆಡ್ ನಡಪುನ ಕಾಲ ಕಾಲೊದ ಪೂಜೆ, ನೇಮನೇರಿಕ್ಕ್ ಪೋದು ಆರಾಧನೆ ಮಲ್ತೊoದು ಬರ್ಪಿನವು ದುಂಬುಡಿಂಚಿ ನಡತೊಂದು ಬಯಿದಿನವು. ಎಚ್ಚಿನ ಗರಡಿಡ್ ಕೋಟಿ ಚೆನ್ನಯೆರ್ನ ಮರತ, ಲೋಹದ ಪಾಪೆದ ರೂಪೊಡ್ ಆರಾಧನೆ ನಡಪುಂಡು. ಜನಸಾಮಾನ್ಯೆರ್ ಗರಡಿ ಅತ್ತಾವಂದೆ ಬೇತೆ ಕಡೆಟ್ ಪೂಜೆ ಆರಾಧನೆ ಮಲ್ಪರೆ ಪೊಡ್ಯೊಂದಿತ್ತೆರ್. ಅಕುಲೆನ್ ಆರಾಧನೆ ಮಲ್ಪರೆ ಗರಡಿಗೇ ಬರೊಡಾಯಿನ ಅಗತ್ಯ ಇತ್ತುಂಡು.

ಕೋಟಿ ಚೆನ್ನಯೆರ್ ಎಂಚ ಇತ್ತೆರ್ ಎನ್ನುನಗ ಕೋಟಿ ಚೆನ್ನಯೆರ್ನ ತೈಲ ಕಲಾಕೃತಿ ಎದುರು ಬರ್ಪುಂಡು. ಈ ಕೋಟಿ ಚೆನ್ನಯೆರ್ನ ಭಾವಚಿತ್ರ ಸಾರ್ವಜನಿಕವಾದ್ ಸ್ವೀಕಾರ ಆವೊಡ್ದುಂಬುನಮನ ನಮನ ಇಲ್ಲಡ್ ಆರಾಧ್ಯ ದೇವ ದೇವತೆಲೆನ ಪಟನು ದೀದ್ ಪೂಜೆ ಮಲ್ಪುನ ರೀತಿಡೇ, ಕೋಟಿ ಚೆನ್ನಯೆರ್ನ ಪೂಜೆ ಮಲ್ಪುನಕ್ಕ ಆವೊಡುಂದು ಕನ ಕಟ್ಟಿನಾರ್ ಬೈದರ್ಲೆನ ಆರಾಧಕೆರಾಯಿನ ಕಕ್ಕುಂಜೆ ದಿ| ಮುದ್ದು ಪೂಜಾರ್ಲು. ಇಂಚ, ಆರ್ 35 ವರ್ಸೊದ ಪಿರಪ ತುಳುವೆರ್ನ ಮನಸ್ಸುಡ್ ಸದಾಕಾಲ ಚೈತನ್ಯ ಕೊರ್ಪಿನ ಅಭಯ ಹಸ್ತ ನೀಡುನ, ತನ್ನ ಮನ್ನಸ್ಸುಡ್ ಮೂಡುದು ಬರೊಂದಿತ್ತಿನ ಕೋಟಿ ಚೆನ್ನಯೆರ್ನ ಬಿಂಬೊನು ಭಾವಚಿತ್ರ ರೂಪೊಡ್ ಕೊರಿಯೆರೆ, ಬೇತೆ ಬೇತೆ ಗರೋಡಿಗ್ ಕಲಾವಿದೆರ್ನೊಟ್ಟು ಪೋದು ಅಯಿತ ಲಚ್ಚನೊನು ತೆರಿಯೊಂಡೆರ್. ಗೊತ್ತಿತ್ತಿನ ಹಿರಿಯೆರಡ, ತೆರಿದಿನಕ್ಲೆಡ ಚರ್ಚೆ ಮಲ್ತೆರ್. ಕೋಟಿ ಚೆನ್ನಯೆರ್ ಎಂಚ ಇತ್ತೆರುಂದು ತೂತಿನಕುಲು ಇಜ್ಜೆರ್ಡಲಾ ಅಕುಲೆನ್ ತೈಲ ಕಲಾಕೃತಿಡ್ ಉಂಡು ಮಲ್ತುಕೊರಿನಾರ್ ಪುದರ್ ಪೋಯಿ ಕಲಾವಿದೆರ್ ಶ್ರೀ ಪಿ. ಎನ್. ಆಚಾರ್ಯೆರ್. ನೆಟ್ ಅಭಯ ಹಸ್ತ, ಬೀರೇರ್ನಾ ಬಲಕಾರ್ ದುಂಬು, ಇಂಚಾ ಪ್ರತಿಮಾ ಲಚ್ಚನಲೆನ್ ಬ್ರಮ್ಮೆರ್ನ ಕಲ್ಪನೆನ್ಲಾ ಕೊರ್ತೆರ್.

ಕೋಟಿ ಚೆನ್ನಯೆರೆ ಪಾರ್ದನೊಡು ಅಗುಲು ಪಾಡುನ ದುತೈತ್ತದ ವಿವರೊ ಇಂಚ ಬರ್ಪುಂಡು…..
“ತರೆಕ್ ಚಪ್ಪರಕೊಂಬು
ಸೊಂಟೊಗು ಒಡ್ಡಿ ನೇವಲ, ಚಲ್ಲನಗೆಜ್ಜೆ
ಕಾರ್ಗ್ ಕಡವ್, ಕೈಕ್ ಬಂಗಾರ್ದ ಬಲೆ
ಕೆಬಿಕ್ ನೇವಲದ ಗುಂಡಲ
ಕೆಕ್ಕಿಲ್ಗ್ ಪಿಲಿಯುಗುರು ಸರಪೊಲಿ
ಬಲಕೈಟ್ ಆಜಚ್ಚಿ ಆಲವುಡ್ ಮೂಜಚ್ಚಿ ಬೊಲ್ಲಿಡ್
ಮಲ್ತಿನ ರಾಮ ಕೆಂಗುಡೆ ಪನ್ಪಿನ ಆಯುದ
ಪಾಂಡವರೆ ಅಂಗಿ, ನಾನಾಯೆರೆ ಪಚ್ಚಡ”

ಆದಿ ಉಡುಪಿ ಶ್ರೀ ಬ್ರಹ್ಮ ಬೈದರ್ಕಳ ಸಾಂಸ್ಕ್ರತಿಕ ಅಧ್ಯಯನ ಕೇಂದ್ರ, ಬೈದಶ್ರೀ, ಉಡುಪಿ ಉಂದುವೇ ಕಲಾಕೃತಿನ್ ೧೯೯೫ಡ್ ಪಾಡ್ದನ ಆಧಾರಿತವಾದ್, ಕುಡೊರಾ ಅವ್ವೆ ಕಲಾವಿದೆರಾಯಿನ ಪಿ ಎನ್ ಆಚಾರ್ಯೆರ್ನ ಕೈಟೆ ಕೆಲವೊಂಜಿ ಪರಿಪೂರ್ಣವಾಯಿನ ಬದಲಾವಣೆಡ್ ಲೋಕೊಗ್ ಅರ್ಪಣೆ ಮಲ್ದೆರ್. ಉಂದುವೇ ಕೋಟಿ ಚೆನ್ನಯೆರ್ನ ಕಲಾಕೃತಿನ್ ಜನಮಂದೆಲ್ ಇನಿಕ್ಕಾವನೊಗ ಸಾರ್ವರ್ತಿಕವಾದ್ ಸಿಕಾರ ಮಲ್ದೆರ್. ಇತ್ತೇ ಈ ಕಲಾಕೃತಿ ಊರು ಪರವೂರುಡು ಭಕ್ತೆರ್ನ ಮನಸ್ಸುಡ್, ಇಲ್ಲ್ ಇಲ್ಲಾಡ್ ಆರಾಧನೆ ಪಡೆಯೊಂದುಂಡು. ನೇಮೊದ ಲೆಪ್ಪುದ ಓಲೆಡ್, ಪ್ಲೆಕ್ಸ್ ಬ್ಯಾನರುಡು, ಅಂತರ್ಜಾಲ ಮಾದ್ಯಮೊಡು ಪ್ರಸಿದ್ಧಿನ್ ಪಡೆಯೊಂದುಂಡು. ಕಾರ್ಲದ ಥೀಮ್ ಪಾರ್ಕುಡು ಇಪ್ಪುನ ಕಲ್ಲುದ ಮೂರ್ತಿಗ್ಲಾ ಉಂದುವೇ ಕಲಾಕೃತಿ ಸ್ಫೂರ್ತಿ ಆದುಂಡು.

ಬರವು: ಮಹೇಶ್ ಬೋಳೂರ್
ಖಜಾಂಚಿ, ಶ್ರೀ ಬ್ರಹ್ಮ ಬೈದರ್ಕಳ ಸಾಂಸ್ಕೃತಿಕ ಅಧ್ಯಯನ ಕೇಂದ್ರ, ಆದಿ ಉಡುಪಿ